Sayt üzrə axtarış

















Əsas səhifə / XƏBƏRLƏR

2018-11-03
Azərbaycan Respublikası Prezidentinin Sərəncamı ilə təltif olunmuş prokurorluq əməkdaşlarına dövlət mükafatları təqdim edilmişdir

Noyabrın 3-də Baş Prokurorluqda Azərbaycan Respublikası Prezidentinin “Azərbaycan Respublikası Prokurorluğunun bir qrup əməkdaşının təltif edilməsi haqqında” 28 sentyabr 2018-ci il tarixli Sərəncamı ilə təltif olunmuş prokurorluq əməkdaşlarına dövlət mükafatlarının təqdim edilməsi ilə əlaqədar tədbir keçirilmişdir.

Tədbir iştirakçıları əvvəlcə Baş Prokurorluğun inzibati binasının foyesində ulu öndər Heydər Əliyevin büstü önünə gül dəstələri qoyaraq, dahi şəxsiyyətin unudulmaz xatirəsinə dərin hörmət və ehtiramlarını bildirmişlər.

Mərasimdə çıxış edən Baş prokuror Zakir Qaralov qeyd etmişdir ki, Azərbaycan Respublikasının Prezidenti cənab İlham Əliyevin müdrik rəhbərliyi altında həyata keçirilən müasir məzmunlu tədbirlər nəticəsində ölkə həyatının bütün sahələrində böyük irəliləyişlərə, müstəqil dövlətçiliyimizin daha da möhkəmləndirilməsinə, vətənimizin iqtisadi qüdrətinin artırılması ilə nəticələnən möhtəşəm sosial-iqtisadi inkişaf göstəricilərinə nail olunmuşdur.

Xüsusi vurğulanmışdır ki, ölkəmiz son 15 ildə sabit və təhlükəsiz şəraitdə sosial-iqtisadi tərəqqisini təmin edərək nəhəng qlobal enerji və nəqliyyat layihələrinin bilavasitə təşəbbüskarı olmuş, dünyadakı nüfuzunu artıraraq 155 ölkənin dəstəyi ilə BMT Təhlükəsizlik Şurasına qeyri-daimi üzv seçilmiş, 3 peykə malik ölkə kimi kosmik kluba daxil olmaqla yanaşı, ən mötəbər tədbirlərə - humanitar, siyasi, iqtisadi, mədəni forumlara, möhtəşəm idman yarışlarına uğurla ev sahibliyi edərək bir dövlət kimi güclü potensiala və mövqeyə malik olduğumuzu dünyaya nümayiş etdirmişdir.

Əldə edilən nailiyyətlər mötəbər beynəlxalq qurumların, o cümlədən biznes sahəsində dünyada ən vacib və etibarlı reytinq göstəricisi sayılan Dünya Bankının “Doing Business 2019” hesabatında Azərbaycanın 10 ən islahatçı dövləti siyahısına daxil edilərək dünyanın ən çox islahat aparan ölkəsi elan olunmaqla ümumi indikatorlar üzrə 190 ölkə arasında 25-ci yerdə qərarlaşması ölkəmizin dinamik sosial-iqtisadi inkişafının parlaq göstəricisi kimi dəyərləndirilmişdir.

Diqqətə çatdırılmışdır ki, respublikamızın davamlı tərəqqisi digər dövlət təsisatları kimi prokurorluq orqanlarının da ardıcıl və müntəzəm inkişafını təmin etmiş, bu mühüm dövlət orqanı fəaliyyətini müasir dövrün daha yüksək tələbləri səviyyəsində quraraq təkmilləşməkdə davam etmiş, cinayətkarlıqla mübarizədə, insan hüquq və azadlıqlarının, milli dövlət maraqlarımızın qorunmasında, sabitliyin və təhlükəsizliyin təmin olunmasında digər hüquq mühafizə orqanları ilə qarşılıqlı əməkdaşlıq şəraitində çalışaraq yeni-yeni uğurlar qazanmışdır.

Xüsusi olaraq qeyd edilmişdir ki, şərəfli bir inkişaf yolu keçmiş Azərbaycan Prokurorluğunun dövlətçiliyin və xalqın maraqlarına xidmət etməklə, qanun çərçivəsində və beynəlxalq standartlara uyğun fəaliyyət göstərən dövlət qurumu kimi müasir məzmunda formalaşması xalqımızın  ümummilli lideri Heydər Əliyevin başladığı və Prezident cənab İlham Əliyevin rəhbərliyi altında yeni müstəvidə davam etdirilən məhkəmə hüquq islahatları və prokurorluğa olan diqqət və qayğısı nəticəsində mümkün olmuşdur.

Baş prokuror dəfələrlə prokurorluğa olan etimadını vurğulayan Prezident cənab İlham Əliyevin məhz Azərbaycan Prokurorluğunun yaranmasının 100 illik yubileyi ərəfəsində 28 sentyabr 2018-ci il tarixli Sərəncamla 43 prokurorluq əməkdaşını yüksək dövlət mükafatları - orden və medallarla təltif etməsinin və Azərbaycan Respublikası prokurorluq orqanlarının əməkdaşlarına və veteranlarına ünvanladığı təbrik müraciətinin prokurorluğun kollektivi üçün böyük sevincə səbəb olduğunu bildirmişdir.

Əminliklə qeyd edilmişdir ki, 100 illik tarixə malik Azərbaycan Prokurorluğunun kollektivi bundan sonra da fəaliyyətinin dövlət tərəfindən göstərilən etimada layiq səviyyədə qurulması üçün üzərinə düşən vəzifələrin layiqincə yerinə yetirilməsini təmin edəcək, ictimai-siyasi sabitliyin və təhlükəsizliyin möhkəmləndirilməsinə, xalqımızın və dövlətimizin cinayətkar qəsdlərdən qorunmasına, insan hüquq və azadlıqlarının etibarlı müdafiəsinə  yönəltməklə respublikamızın dinamik inkişafına istiqamətləndirilmiş yeni məzmunlu dövlətçilik siyasətinin reallaşdırılmasında öz xidmətlərini göstərəcəkdir.

Tədbirdə Azərbaycan Respublikasının Prezidenti cənab İlham Əliyevin “Azərbaycan Respublikası Prokurorluğunun bir qrup əməkdaşının təltif edilməsi haqqında” 28 sentyabr 2018-ci il tarixli Sərəncamına müvafiq olaraq, ölkədə qanunçuluğun təmin edilməsində, ağır və xüsusilə ağır cinayətlərin istintaqının aparılmasında, korrupsiyaya qarşı mübarizədə, məhkəmədə dövlət ittihamının müdafiə olunmasında yüksək peşəkarlıq göstərdiklərinə, xidməti vəzifələrinin yerinə yetirilməsində fərqləndiklərinə görə “Vətənə xidmətə görə” ordenləri, “Tərəqqi”  və “Dövlət qulluğunda fərqlənməyə görə” medalları ilə təltif edilmiş prokurorluq əməkdaşlarına dövlət mükafatları təqdim olunmuşdur.

Prokurorluq əməkdaşlarının dövlət mükafatlarına layiq görülməsi Azərbaycan Prokurorluğuna Dövlət başçısı tərəfindən göstərilən yüksək etimad və inamın ifadəsi, dövlətçiliyimizin maraqlarının qorunması işində prokurorluğun fəaliyyətinə verilən yüksək qiymət kimi dəyərləndirilmiş və prokurorluğun kollektivi üçün böyük məsuliyyət yaratdığı qeyd edilmişdir.

Dövlət təltifinə layiq görülmüş əməkdaşlar çıxış edərək onların fəaliyyətinə verilmiş yüksək qiymətə görə Azərbaycan Respublikasının Prezidentinə dərin minnətdarlıqlarını ifadə etmiş və fəaliyyətlərini bu etimada layiq səviyyədə qurulması üçün mümkün tədbirlər görəcəklərini bildirmişlər.

Tədbirin yekununda Azərbaycan Respublikası Prokurorluğunun kollektivi adından Prezident cənab İlham Əliyevin ünvanına yekdilliklə müraciət qəbul edilmişdir.